Act 19 | ASO | STEP | Apolo' aza Kolidi ebeku' neivo Paulo' aza misubo oluso' dizo ledo Eheso ebeta heteline'. Hetelo Izesu' evenele zuho linge ma a'mida minani' ningo

Acts 19

Paulo' Eheso Ebeta Mono' Lo-ngemo Minine' Gamazi

1 Apolo' aza Kolidi ebeku' neivo Paulo' aza misubo oluso' dizo ledo Eheso ebeta heteline'. Hetelo Izesu' evenele zuho linge ma a'mida minani' ningo 2 longo' o-ngedo ti' lo line': Lingine nene mono' gili ele'vole' igi O'moso'mi Sikalahu' lehizikeni' nehe lo longo' o-ngedavo ingine ti' li lani': O've. Laza O'moso'mi Sikalahu' neive li ma li-limavo gelamune' ve. 3 Ti' li likevo gohi longo' o-ngidine': Lingine zaa' mono' gilisa noso hilave. Lavo ingine ti' li lani': Zohane' mono' gelo noso hulune' ve. 4 Ne'mine likevo Paulo' ti' lo lo-ngimine': Zohane' aza nene evene' ingine lu'ine di velepe' izangumu' noso holo-ngedo ti' lo lo-ngimine': Mehe'nela ve ma nave. Ezemu' nene gili ele'vole' ilizani' o neive. Ido' ti' lo line' nemu' naza lo-lengemelove. A'mine gili ele'vole' ilizave nene Izesu' ve. 5 Lavo gili Guvelesi ve Izesu' gulivelo' noso hilani'. 6 Noso hilikevo Paulo' ana godo'nido' hitavo O'moso'mi Sikalahu' engita lemo minavo gamazi nene ato ato' no'ninguti' li O'moso opo'ni li eze gamazi've li soto' ani'. 7 A'mine ve nene tuvelu ne'mine minani'.

8 Ne'mine ikevo Paulo' aza Zuda veti mono' numungu' dizo O'moso'mo gizebo o-ledeline' aka ne'mi monovomu' lovo' kiselevo' ogo mulu'ningu' hizo lo-ngimivo li volelo' melo' igi nizavo ike'ni seto hamo' ogo vine'. 9 Ne'mine ogavo ve linge ma a'manapa igi eze gamazi gili imami go'nido' ningi evene' mukiliti ve'nido' Izesu' aka divi' ledivi' ani'. Ne'mine ikevo hulo-ngedo Izesuda gi'mizave ngele'mizo vo do nubo o-ngedo gamene gamene ve ma gulive Tilano' ei' gamazi apize ngemaa' ine' numungu' Izesu' gamazi've li volelo' melo' igi minani'. 10 Nizavo Asia misuboukoti' aleve muki' Zuda vesi ido' nGiliki alevesi mukito' Guvelesi ve'mi gamazi gili osu' li linge ma ne gili dani'za linge ma nene gili hulani'. Ne'mine navo kilisimasi seta' ogo vine' ve.

Sikeva' Gipele Zuholiti Gamazi

11 O'moso'mo Paulo'ni hize ele' o-davo inite' amadi'mine atoli'mine ine'. 12 Ne'mine ogavo nemu' evene' ma nete Paulo' oko'noloti' gono dalosa golihilelo' angisipi likeka' inekisi ido' gopololo' tauli likeka' ine' nesi di vi inite' gizi dave ngimikevo di gili lamine' nigilavo lu'ningu' sikalahu' goloso minine' nesi dizi golise vaa' ani'. 13 Ne'mine igi nizavo Zuda ve linge ma minani' ingine sikalahu' goloso evene' lu'ningu' minani' nene ngimiseli hulato' gono di'mi monaa' ani'. Engikuti' malite Izesu' gulive ogo sikalahu' goloso ngimiselo hulokunivo vilizahe li ningelone li Guvelesi ve Izesu' gulive li avazaha igi sikalahu' goloso ti' li li-ngimaa' ani': Paulo' aza eze gamazi lo soto' oga' ive Izesu' eze velemu' ogo vilo lo nolo-lingimune. 14 Ne'mine iga' aveuti' ma nene Zuda ve minine' ado' eveneto' medelo mino O'moso inite' lehize-daa' ive naba ado' gulive Sikeva' ne'mi gipele seveni minani' netesi ne'mine ani'. 15 Ne'mine li sikalahu' goloso mamu' vozo likevo sikalahu' goloso aza do velepe' izo ti' lo lo-ngimine': Naza Izesu'nimu' gele nouve. Ido' Paulo'nimukisi mo gele nouve. Ne'mino neiha lingine zamote nizave. 16 Ne'mine lo sikalahu' goloso lulou' minive aza oluto' molo dovo' hikilevo' o-ngedo ngebelo ngivile' ogavo oko'ine vanise ogo malalapa izavo oko'nido' inite' boloto osu' lavo bakakovo' a'mine numunguti' golise limi vani'. 17 Ne'mine ikevo a'mine gamazi Eheso ebeta buu lo vavo Zuda vesi nGiliki alevesi gili osu' li golise ngemavo Guvelesi ve Izesu'ni di hozi li-di opo'ni lani'. 18 Ne'mine ikevo Izesu'nimu' gili ele'vole' iga' ave muki' igi luso gamazi ato atoli'mine nene li soto' igi osu' lani'. 19 Ido' gozopo' luso gono daa' ave lingelite luso gizaa' ani' buku nene gililihe' mili di igi evene' mukiliti ve'nido' oloku' gizani'. Ne'mine igi a'mine bukulo' moni hulani' ne'mi naba've di ningani' nene siluva' fifti tauseni (50,000) ne'mine minine' ve. 20 Ne'mine ikevo Guvelesi ve'mi gamazi ne'mo amuzo molo soto' ogo buu lo hutile' ogo gihile izine'.

Eheso Ebeku' Aleve Gopo Gani Li Gulugulunga Lani' Gamazi

21 Ne'mine ogavo Paulo' aza Makedonia misubouko ido' Akaio misubouko vo'mo vo'mo Zelusalemi ebeta volove lo lulo'mo lavo ti' lo line': Naza Zelusalemi ebeta vo hetelo gohi vo Loma ebeta volove. Ne'mine gala gele hamo' ogo 22 nasahili' i-di makato' gono daa' asive seta' Timoteoki Elasitoki ngimiselavo Makedonia misubouko gomu' vasine'. Vikesivo Paulo' aza gamene gohi ma imine' molo Asia misubouko minine'.

23 Ido' a'mine gameneu' Eheso ebeta Izesu' akamu' lovo lolize naba soto' ine'. 24 A'mido' siluvatunu' gonolise'vesi inite' lolo' oga' ive ma minine' gulive Demetelio'. Aza neve avazaha o'moso nite'ine'mi gulive Alateme' ei' mono' numu've'mi avazaha've gidini ngomo ngomo lolo' ogo bisinisi oga' inako azasi ido' maka' gono daa' avesi a'mine gonoloti' moni naba daa' ani'. 25 Ne'mine ogavo Demetelio' aza ezesi gono daa' avesi ido' a'mine ne'mine gono daa' ave linge masi do mulise molo-ngedo ti' lo lo-ngimine': Vekizo, lingine mo ningi gili nizave. Mene gonoteloti' moni heneni soto' ogavo mine lamine' ogo minaa' noune. 26 Ido' a'mine ve Paulo' ne'mi monovo ningi gili nizave. Aza nene Eheso ebetati' ido' Asia ebe' mukikukoti' aleve muki' ga'ine hizo lu'ine do gopo o-ngedo evene' adedunu' lolo' une' o'moso nite' nene inite' gihile nomive lo lo-ngemaa' neive. 27 Ne'mine lo'mo monivo monivo leli' gono nene lemeleseive. Ido' leli' o'moso nitete naba Alateme' ei' mono' numunomu' nene evene' mukilite gilavo lemeleseive. Ne'mine ogavo Asia misubouko alevesi ido' numudo' namado' vesi Alatemengumu' ngolize izi opo'ni laa' nani' nenako dize minine' ma mo lemo ongalihe lo nehelele izave.

28 Ti' lo lavo ingine gili mulu'ningu' olo' lo ngizebolo' molavo geke' naba li ti' li lani': Eheso aleveti izeteho Alateme' nene guvelesi alu naba ma ne neive li lani'. 29 Ne'mine li likevo a'mine ebeto' aleve nene gopo gamazi li gulugulu li zohito' di gese' iga' ebeta loti' izi vi di gese' igi Makedonia misubo nabaukoti' Paulolesi monaa' ave seta' gulive'ine Gaioki Alisitakoki a'nido' di gelelehe' igi di vani'. 30 Ne'mine ikevo Paulo' aza gelo evene' di gese' angu' volove lavo Izesu' zuholite vamilive li o've li-dani'. 31 Ne'mine ikevo Asia misubouko guve'inesi ve linge Paulo' zogo ve minani' ingine evenelite zohi' ebeku' di gese' angu' nene vo soto' amilive li gamazi hulikevo vavo giline'. 32 Gelavo di gese' ave engikuti' evene' muki' ingine di gese' ani' ne'mi monovo gilami malite hamo' gamazi lani' ido' linge malite ato' gamazi lani'. Ne'mine li minanako ne'mo lu'ine gopo ogavo haza geke' geke' li minani'. 33 Ne'mine igi nizavo Zuda ve ingine engi' evene'ine ma minine' gulive Alekisadelo'ni nene di oti-di ehuso' i hulikevo evene' muki' ingine lihime'vesi noloseive likevo aza ana do vilivi' molo ne nomive lo gamazi lo-ngemelesa line'za 34 evene' muki' ingine ningani' leli' o'mosote nene haza nite' ve li gilaa' nave Zuda veuti' ve ma nave li ningi gili geke' li ve'ninguti' ve'ninguti' gamazi li hamo' igi ti' li lani': Eheso aleveti izeteho Alateme' nene guvelesi alu naba ma ne neive. Li nizavo ho' gamene tu aua osu' line'. 35 Ne'mine ikevo kanisoleliti gamazilo' gizebo oga' ive'mo do hongu lo-ngedo ti' lo lo-ngimine': Lingine Eheso alevekizo, Alatemete lamine' eze mono' numuno naba ido' Okulumokuti' ei' emeni damenisi gele vine' geheni ma limine' a'mine inite' gizebo oga' une' melemote nobe. Nene gamazi nene numudo' namado' ve nene moda gili osu' li nizave. 36 Ne'mino nomive lo zaa' ve'mo lilive. Lilive ma nomive. Nemu' lingine lutine di hongu li inite' gopo' napa damilo. 37 Mela ngele'mizi ave nete o'moso initete eze mono' numuno nabati' inite' ma gumine disa'masive ido' o'moso nitetemu' levelenga li emenga lisa'masine' ma neive. 38 Ne'mine ogavo Demeteliokisi ido' ezesi maka' gono daa' ave nete ve masi gamazi gono dalizado' o noline' nene goni' iga' gamene ha neine' ve. Ido' goni' gilaa' ave zasi naba ha nizave. Nemu' a'mida di vi goni' i-dilisave. 39 Gamazi gono ma neivo ma evene' muki' mulise milalizani' gameneu' muliselo' di vikevo gamazi gono di gililizave. 40 Ido' lingine idi'nise nene hazamu' gopo lovo hizikeni' hakave. Nemu' nene guvetesi ve naba nete nadive li-limilizave. Goni' i-lidikevo ma laza nani gamazi lo-ngimunivo gilavo lamine' ilive. Ne ma nomive. 41 Ne'mine lo gamazilo' gizebo ve'mo mulise milave ngimisele hulavo vani' ve.